Framtíð Landakotsskóla í óvissu

Ástandið í Landakotsskóla er ekki að skýrast þrátt fyrir fund stjórnar og foreldra í gær. Formaður stjórnar Stjórn Landakotsskóla hélt fund í gærkvöldi með foreldrum barna í Landakotsskóla. Búist var við því fyrir fundinn að mál skólans myndu skýrast á fundinum.  Margrét Halldórsdóttir sem fer nú með starfsmannamál í skólanum ásamt Írenu Kojic, meðan enginn skólastjóri er við störf, las upp nafnalista með nöfnum átta þeirra kennara sem hafa skuldbundið sig til að kenna áfram við skólann. Hún tók það fram að einhverjir kennarar hefðu ekki enn gefið svar sitt um það hvort þeir ætluðu að halda áfram störfum. Laufey Jónsdóttir sem hefur verið kennari við skólann las upp yfirlýsingu með um átta öðrum nöfnum kennara sem ætla ekki að sækja um áframhaldandi starf við skólann og skoruðu á stjórn skólans að segja af sér. Sami hópur kennara  leitaði í gærmorgun til lögfræðings til þess að kanna réttarstöðu sína gagnvart því sem þeir töldu vera þvingandi ráðningarskilyrði skólastjórnarinnar eins og kemur fram í Fréttablaðinu í dag. Það virðist því vera sem kennaraliðið skiptist upp í tvær mjög skýrar fylkingar, annars vegar þeir sem hafa ákveðið að starfa við skólann og styðja skólastjórnina og hins vegar sá hópur sem hefur ekki sagt ætla að starfa við skólann og leitar nú  réttar síns. Hvorug fylkingin virðist ætla að gefa eftir í málinu. Gunnar Örn Ólafsson stjórnarformaður tók til máls að þessu loknu og lýsti því yfir að meginspurningin væri hvort skólastarf myndi halda áfram í Landakotsskóla eða ekki. Svo virðist sem þriðji hópurinn í málinu sé kominn fram en það er hópur foreldra sem tekur ekki afstöðu með annarri hvorri fylkingu kennara í málinu heldur bað fundargesti að hugsa fyrst og fremst um hag þeirra barna sem nema við skólann. Kona kom í pontu og flutti ræðu þess efnis og hlaut mikið lófaklapp fyrir.