Öllum í frystihúsinu sagt upp

Öllum þrjátíu og tveimur starfsmönnum í frystihúsi Samherja á Stöðvarfirði verður sagt upp 1. september næstkomandi þegar Samherji hættir landvinnslu í bænum. Fulltrúar Samherja funduðu með fulltrúum verkalýðsfélagsins Vökuls og starfsmönnum frystihússins í dag og var tilkynnt um þau áform félagsins að sameina landvinnslur þess á Stöðvarfirði og Dalvík á síðarnefnda staðnum. Í fréttatilkynningu frá Samherja segir að sameiningaráformin hafi fyrst verið kynnt á samráðsfundi með verkalýðshreyfingunni og starfsmönnum í janúar síðastliðnum og frá þeim tíma hafi verið unnið að því að draga úr áhrifum breytinganna á atvinnulíf á Stöðvarfirði. Fyrir liggi að vöntun sé á starfsfólki, bæði á Stöðvarfirði og öðrum þéttbýlisstöðum á svæðinu, frá Breiðdalsvík til Norðfjarðar, en um sé að ræða störf í sjávarútvegi og ýmsum öðrum greinum. Það er trú Samherja að þau verkefni sem unnið sé að auki atvinnutækifæri íbúa Stöðvarfjarðar.