Sjávarútvegurinn skiptir ekki máli

"Það er ástæða fyrir því að Síldavinnslan hefur ákveðið að hætta vinnslu á þorski í landi," segir Björgólfur Jóhannsson, forstjóri Síldarvinnslunnar í Neskaupsstað. Niðurstöður nýrrar skýrslu um hágengi sem margir innan sjávarútvegs hafa beðið eftir liggja fyrir og þrátt fyrir að útvegsfyrirtæki búi við erfið rekstarskilyrði þykir vart tilefni til að hafa áhyggjur af stöðu greinarinnar í heild. Þessar upplýsingar eru ekki uppörvandi fyrir marga sem von áttu á raunhæfum tillögum frá nefndinni á borð við Samtök fiskvinnslustöðva og Björgólfur segir þetta lýsandi dæmi um að sjávarútvegurinn sé hættur að skipta máli í þjóðarbúskapnum. "Ég átti í raun ekki von á neinum sérstökum tillögum frá nefndinni eins og aðrir enda nokkuð ljóst að hátt gengi krónunnar er eitthvað sem veltur á fjölmörgum þáttum og ekkert einfalt að bregðast við. Staðan er sú að við hjá Síldarvinnslunni höfum ákveðið að draga saman seglin eftir getu og meðal þess sem við gerðum var að hætta vinnslu á þorski í landi enda treystum við okkur ekki til að reka vinnslu á núllinu." Hágengisnefndin leggur fram tillögur til að stemma stigu við háu gengi en mælir ekki með neinni þeirra. Ekki sé viðunandi að gripið verði inn í aðgerðir Seðlabankans en hækkun bankans á stýrivöxtum er ein meginástæða gengishækkunar. Frekar er talið ráðlegt að beita fjármálastefnu ríkisins til að gefa bankanum svigrúm til að draga úr aðhaldi með frestum stórframkvæmda og skattalækkanna. Bent er á að samkeppni ríkisins á íbúðalánamarkaði sé ein rót vandans og gefi það tilefni til að endurhugsa hlutverk Íbúðalánasjóðs. Ennfremur er bent á að lækkun veiðigjalds gæti haft jákvæð áhrif en ekki er mælt með slíku þar sem slík lækkun hefi engin áhrif á hag fiskvinnslunnar sem er sú grein sem höllustum fæti stendur. Árni Mathiesen, sjávarútvegsráðherra, segir koma sér á óvart hversu sterkur íslenskur sjávarútvegur sé í heild sinni. "Afkoman þrátt fyrir allt er ekki verri en hún var allan síðasta áratug en kröfurnar eru orðnar meiri. En það er ekkert sem fram kemur í skýrslunni sem gefur tilefni til að fara í sértækar aðgerðir."