Breytingar ekki útilokaðar

"Þetta hefur ekki verið kynnt með neinum hætti í þingflokknum og ég fæ ekki séð að þetta skipti miklu máli," segir Einar Oddur Kristjánsson, þingmaður Sjálfstæðisflokksins, vegna ágreinings þeirra Davíðs Oddsonar, utanríkisráðherra og Halldórs Ásgrímssonar, forsætisráðherra, um breytingar á eftirlaunafrumvarpi ráðherra og þingmanna. Sjálfstæðismenn hafa löngum verið eini flokkurinn sem sýnt hefur frekari breytingum andstöðu en aðeins eru tvo ár síðan breytingar voru síðast gerðar á frumvarpinu. Vill Halldór Ásgrímsson láta breyta eða taka út ákvæði sem gefur fyrrverandi ráðherrum og þingmönnum fullar eftirlaunagreiðslur þrátt fyrir að viðkomandi sinni enn öðrum fullum störfum innan ríkisgeirans. Þeir aðilar eru þannig í raun á tvöföldum launum. Pétur Blöndal, sjálfstæðismaður, segist ekki vita til þess að núningur sé vegna þessa máls milli stjórnarflokkanna telur sjálfsagt og eðlilegt að ræða þessi mál sem önnur og útilokar ekki að breytingar verði gerðar í framtíðinni. "'Ég veit ekki til þess að það sé nokkur núningur vegna þessa máls milli stjórnarflokkanna. Það má þó ekki gleyma að allar breytingar sem gerðar eru hafa áhrif á tugþúsundir starfsmanna ríkisins. Það hefur verið venjan hingað til að menn sem eru komnir á eftirlaun mega vinna ef þeim sýnist svo öfugt við til dæmis örorkulífeyri sem er hugsaður sem trygging fyrir tekjumissi. Þetta er einn angi af miklu stærra máli en ég er reiðubúinn að skoða allar hugmyndir um breytingar." Annar sjálfstæðismaður, Einar K. Guðfinnsson, segist einnig reiðubúinn að skoða allar breytingar varðandi eftirlaunafrumvarpið en þær hugmyndir verði þá að vera heilsteyptar. "Ég hef sjálfur engar stórar meiningar varðandi frumvarpið eins og það er í dag en það var alltaf talað um að sjálfssagt væri að skoða þetta þegar fram liðu stundir og ég er reiðubúinn til þess. Ég ítreka hins vegar að þetta hefur ekki komið upp eða verið rætt sérstaklega innan þingflokksins."