Diouf á yfir höfði sér málssókn

Vandræðagemlingurinn El-Hadji Diouf, sem nýverið lýsti því yfir að hann vildi semja við lið Bolton, þar sem hann hefur verið á lánssamningi í vetur, á nú yfir höfði sér enn eina kæruna vegna spýtinga sinna á leikvellinum. Diouf spýtti á áhorfendur í leik gegn Middlesbrough í haust og fékk refsingu frá enska knattspyrnusambandinu fyrir vikið, en nú er verið að undirbúa einkamál gegn honum af einum af áhorfendunum sem urðu fyrir hrákanum. Diouf hefur átt í miklum erfiðleikum með að halda munnvatni sínu á síðustu árum og lenti í vandræðum þrjú ár í röð vegna hliðstæðra atvika. Þessi hrákahneigð leikmannsins hefur óneitanlega skemmt mikið fyrir honum, því engum dyljast knattspyrnuhæfileikar hans, þrátt fyrir að hann eigi afar erfitt með að temja skap sitt.