Enginn eigi að segja af sér

Sturla Böðvarsson samgönguráðherra segir að hann og aðrir ráðherrar beri ábyrgð á því að ákveðið hafi verið að hafna öllum tilboðum í Héðinsfjarðargöng á sínum tíma. Hann segir deildar meiningar um hvort ríkið hafi brotið lög, eins og héraðsdómur hefur sagt, Hæstiréttur eigi eftir að fjalla um málið. Hann telur að enginn eigi að segja af sér vegna málsins. Héraðsdómur Reykjavíkur staðfesti í gær álit kærunefndar útboðsmála um að ríkið hefði brotið lög með því að hafna öllum tilboðum í Héðinsfjarðargöng. Eins og kunnugt er taldi ríkisstjórnin, eftir að tilboð voru opnuð, að efnahagsástandið leyfði ekki að farið yrði í framkvæmdirnar en þau rök þykja ekki nægjanleg að mati kærunefndarinnar og héraðsdóms. Sturla Böðvarsson samgönguráðherra segir um málið séu deildar meiningar og að sjálfsögðu verði farið yfir það og lærdómur dreginn af niðurstöðu dómsins en Hæstiréttur hafi ekki kveðið upp sinn dóm. Ráðherra fagnar því að ríkið skuli hafa verið sýknað af skaðabótakröfu Íslenskra aðalverktaka í málinu en héraðsdómur taldi fyrirtækið ekki geta sannað með óyggjandi hætti að það hefði, þrátt fyrir lægsta boð, fengið verkið og grætt á því þrátt fyrir að vera þremur prósentum yfir kostnaðaráætlun. Það kom í hlut vegamálastjóra að bjóða verkið út og síðan að hafna tilboðum, sem telst lögbrot. Sturla segir að enginn sé í þeirri stöðu að hann þurfi að segja af sér vegna málsins. Ríkisstjórnin hafi tekið ákvörðun um að fresta framkvæmdunum og vegamálastjóri hafi ekki verið í neinni annarri stöðu en að ganga ekki til samninga við lægstbjóðanda í þessu tilviki. Sturla segir rétt að bíða eftir niðurstöðu Hæstaréttar. En hvað með ábyrgð samgönguráðherra? Sturla segist hluti af ríkisstjórninni og hún beri sína ábyrgð á málinu. Ákvörðunin hafi verið fullkomlega eðlileg enda hafi komið í ljós að verktakafyrirtækið hafi ekki orðið fyrir neinum skaða þannig að bætur séu í samræmi við það sem fyrirtækið hafi gert kröfu um.