Borgararéttur líklegur fyrir páska

Líkur eru til að Bobby Fischer verði kominn með íslenskan ríkisborgararrétt fyrir páska. Sendiherra Íslands í Japan fékk að heyra það frá fyrstu hendi hjá yfirmanni innflytjendaeftirlits Japans að Fischer fengi að koma hingað fengi hann íslenskt ríkisfang. Allsherjarnefnd var einróma í afstöðu sinni en formaður hennar, Bjarni Benediktsson, segir það fyrst í dag hafa verið endanlega staðfest af japönskum yfirvöldum að Fischer yrði látinn laus fengi hann íslenskan ríkisborgararétt. Bjarni segir að nokkur atriði hafi haft áhrif á að nefndin hafi komist að þessari niðurstöðu. Í fyrsta lagi hafi Fischer nokkuð rík tengsl við landið og í öðru lagi hafi stjórnvöld áður lýst yfir velvilja í garð hans og hafi viljað greiða fyrir för hans hingað, en þær aðgerðir sem stjórnvöld hafi gripið til hafi ekki dugað þegar á reyndi. Í þriðja lagi hafi það áhrif að Fischer losni úr haldi í þeirri stöðu sem hann sé í Japan, en hann eigi þar í deilum við japönsk stjórnvöld vegna þess að hann hafi verið með ógilt vegabréf. Þegar þetta hafi allt saman verið virt hafi allsherjarnefnd orðið einróma sammála um að mæla með því við þingið að Fischer yrði veitt íslenskt ríkisfang. Aðspurður hvenær hann eigi von á að þingið taki málið fyrir segir Bjarni að frumvarp um málið líti dagsins ljós á mánudag. Hann geri ráð fyrir því að það verði vilji fyrir því á þingi að flýta afgreiðslu þess svo því yrði lokið fyrir páska. Bjarni segir nefndina ekki hafa rætt um afstöðu Bandaríkjastjórnar til málsins enda hafi Fischer verið í haldi vegna þess að vegabréf hans var útrunnið. Það hefur hins vegar margoft komið fram að stjórnvöld í Bandaríkjunum telja Fischer þurfa að svara til saka heima fyrir. Mögulegt er að Bandaríkjamenn fari fram á framsal skákmeistarans eftir hann fær íslenskan ríkisborgararétt. Óljóst er hvernig mál fara þá.