Komin í úrvalsdeildina

"Þetta er gríðarmikil viðurkenning. Þessi verðlaun koma eiginlega strax á eftir Óskarnum í umfangi og stærð," segir Ásgrímur Sverrison kvikmyndagerðarmaður um sigur Valdísar Óskarsdóttur á Bafta-verðlaunahátíðinni í Bretlandi í fyrrakvöld. Valdís fékk þar verðlaun fyrst Íslendinga fyrir að klippa myndina Eternal Sunshine of the Spotless Mind með Jim Carrey og Kate Winslet í aðalhlutverkum. Sigraði hún þar fræga klippara á borð við Thelmu Schoonmaker, sem vann að stórmynd Martin Scorsese, The Aviator. Thelma hefur einmitt verið tilnefnd til Óskarsverðlaunanna í ár, eins og klipparar myndarinnar Collateral sem einnig töpuðu fyrir Valdísi í fyrrakvöld. "Þessi verðlaun eru forleikur að Óskarnum og hafa í gegnum árin gefið sterkar vísbendingar um sigurvegarana þar. En af einhverjum óskiljanlegum ástæðum er Valdís ekki tilnefnd til Óskarsverðlaunanna. Sigurinn hjá Bafta sannar hversu undarlegt var að tilnefna hana ekki til þeirra verðlauna," segir Ásgrímur. Ásgrímur segir að Thelma hafi alla tíð verið í miklu uppáhaldi hjá Valdísi enda hefur hún klippt nánast allar myndir Martins Scorsese. Á meðal þeirra eru Goodfellas, Casino, Gangs of New York og Raging Bull, sem hún vann Óskarinn fyrir árið 1980. "Hún er klippari númer eitt í dag enda raðar Scorsese bara í kringum sig toppfólki. Ég hef heyrt Valdísi hlaða hana lofi og prísi," segir Ásgrímur, sem segist ekki vita hvort Bafta-verðlaunin eigi eftir að breyta ferli Valdísar. "Þetta sýnir alla vega og sannar að hún er komin í úrvalsdeildina í heiminum eins og hún hefur verið í dálítið mörg ár. Þessi verðlaun eru staðfesting á því." Ásgrímur vann lítillega með Valdísi fyrir mörgum árum þegar hann aðstoðaði hana við klippingu á Sódómu Reykjavík. "Það var sérlega ljúft. Hún er alveg frábær manneskja. Ég kunni afskaplega vel við hana og hún er yfirveguð og æðrulaus. Það er hennar stærsta "talent." Hún hefur góða heildaryfirsýn eins og allir góðir klipparar þurfa að hafa." Þess má geta að leikstjóri Eternal Sunshine of the Spotless Mind er Michel Gondry sem áður hefur leikstýrt mörgum myndböndum Bjarkar Guðmundsdóttur, þar á meðal Human Behavior, Army of Me og Hyperballad. Kann hann því greinilega vel að starfa með íslenskum kjarnakonum.