Gaman að keppa í fegurðarsamkeppni

"Mér líst mjög vel á þetta og er bara spennt," segir Sigrún Bender Ungfrú Reykjavík sem er á leiðinni út til að keppa í Miss Europe. "Þetta verður heilmikið ferðalag. Við byrjum á að fara til Parísar og förum þaðan á litla eyju hjá Túnis þar sem við munum dvelja í tíu daga áður en við höldum til frönsku alpanna í æfingabúðir. Síðan endar ferðin með keppninni í París," segir Sigrún sem lenti í þriðja sæti í Miss Skandinavia á síðasta ári. Fatahönnuðirnir í Pell og Purpuri hafa hannað glæsilegan kjól á Sigrúnu. "Ég kom með ákveðnar hugmyndir og svo unnum við þetta saman. Þær eru alveg frábærar og hafa hannað kjólinn alveg út frá mínum líkama. Freydís Jónsdóttir hjá Gallerý Freydís er líka búin að vera algjör perla. Hún er búin að hanna og gefa mér bíkini fyrir keppnina. Þessi bikíní eru mjög falleg og skreytt steinum og sérsaumuð svo þau passa fullkomnlega." Allan tímann sem Sigrún dvelur úti þarf hún náttúrulega að vera óaðfinnanleg. Hún þarf að sjá um förðunina sjálf en hefur fengið góðan styrk frá Nina Ricci. "Ég þarf að vera förðuð allan tímann og þá er gott að hafa góðar snyrtivörur. Eftir svona langan tíma koma óhreinindi í húina en farðinn frá Nina Ricci er ótrúlega góður. Hann er mjög léttur og leyfir húðinni að anda vel." Sigrún dvelur úti í fjórar vikur. Hún segist alls ekki sjá eftir að hafa byrjaði á þessu fegurðarkeppnisstússi þótt þetta geti verið hörku vinna. "Það er ekki allt tekið út með sældinni en þarna fær maður tækifæri á að upplifa margt sem maður hefði annars ekki tækifæri á að gera. Ég fer ein út en Elín Gestsdóttir mun líklega koma á keppnina og vonandi kærastinn minn, Ragnar Ingason, líka." Hún er ekki búin að spá mikið hvað gerist ef hún sigrar keppnina enda er hugurinn aðallega við flugnámið. "Ef ég stend uppi sem sigurvegari tekur líklega við ár þar sem ég að starfa fyrir keppnina, taka þátt í tískusýningum og starfa við góðgerðarsamkomur og svo væri manni ábyggilega komið áfram í fyrirsætubransanum. Lestu ítarlegt viðtal við Sigrúnu í tímaritinu Magasín sem fylgir DV í dag.