Þorrablót Pottorma í laugunum

Það var mikið um dýrðir í Laugardalslauginni í dag þar sem Pottormar héldu sitt árlega þorrablót. Fyrrverandi forsætisráðherra bauð upp á rótsterkt, kínverskt brennivín sem upphaflega hafði verið flutt inn sem hvítvín og lesið var bréf frá Monicu Lewinsky, fyrrverandi lærlingi í Hvíta húsinu. Jón í Sunnukjöri sá eins og endranær um þorramatinn og Inga Auðbjargar lék á gítar og harmoniku. Þessi félagsskapur, Pottormarnir, er hópur fólks sem hittist reglulega í laugunum. Steingrímur Hermannsson, pottormur og fyrrverandi forsætisráðherra, segir að hópurinn komi í hádeginu og margir klæði sig alltaf úti. Það séu hinir hraustu eins og hann. Hópurinn hittist tvisvar til þrisvar á ári og er að sögn Steingríms frábær félagsskapur. Sumir hverjir, eins og hann, hafa verið í honum frá því að laugarnar voru opnaðar fyrir 30 árum. Alltaf er haldið upp á þorrann og alltaf kemur Steingrímur með kínverskt brennivín, sem þarf að skýra aðeins betur. Steingrímur segir að þegar hann hafi verið í opinberri heimsókn í Kína 1986 hafi Zhao Zhiang, þáverandi forsæitsráðherra Kína, fært honum í kveðjugjöf kassa með fransk-kínversku hvítvíni sem hann hafi sagt að nýverið væri byrjað að framleiða þar í landi. Svo hafi hann farið í tollin á Íslandi og sagst vera með hvítvínsgjöf en tollurinn hafi tekið vínið. Daginn eftir hefðu tollararnir hringt í hann og sagt að þetta væri undarlegasta hvítvín sem þeir hefðu séð. Þá hafi þetta reynst vera misskilningur hjá honum. Steingrímur segir starfsmenn kínverska sendiráðsins afar liðlega í að útvega þennan drykk.   Þá var lesið bréf frá Monicu Lewinsky sem fræg varð fyrir samband sitt við Bill Clinton, en hún er pottormunum afar kær. Pottormar segja Framsóknarflokkinn aldrei hafa risið eins hátt og þegar Steingrímur var formaður hans. Gunnar Ingi Gunnarsson, einn pottormanna, segir að Steingrímur hafi trúað sér fyrir því á sínum tíma að hann hefði stillt af ríkisstjórnarfundi þannig að þeir pössuðu inn í heimsóknirnar í laugarnar, fyrst og fremst til þess að hann vissi hvað hann ætti að tala um á ríkisstjórnarfundum En þrátt fyrir þessa forsögu stendur ekki til að bjóða Halldóri, eftirmanni Steingríms, í félagið. Gunnar segir að pottormarnir bjóði ekki hverjum sem er. Steingrímur hafi verið þeirra maður og verði það áfram.