Rústaði Goyaverðlaununum

Fókus fylgir DV í dag og þar er eins og alltaf ítarleg umfjöllun um allar nýjustu bíómyndirnar sem eru komnar á Klakann. Þessa helgina eru Meet the Fockers, Million dollar baby, Assault on Precinct 13 og spænska myndin The Sea Inside, eða Mar Adentro, frumsýndar. Sú síðastnefnda vann fleiri Goya-verðlaun á Spáni en nokkur önnur mynd hefur gert. Ferill spænska leikstjórans Alejandro Amenábar er ferill snillings. Hann og vinur hans Mateo Gil hættu í kvikmyndaskóla í Madrid til að gera sína fyrstu mynd saman, tryllinn Tesis. Síðan skrifuðu þeir saman og Amenábar leikstýrði Abre los ojos með Penelope Cruz, sem var endurgerð sem Vanilla Sky vestanhafs. Næst gerði Amenábar The Others með Nicole Kidman, sem sló rækilega í gegn á heimsvísu. Auk þess að skrifa og leikstýra semur Amenábar einnig tónlistina við myndir sínar og Gil. Nýjasta mynd hans, The Sea Inside (Mar Adentro), fær síðan einróma lof, vann Golden Globe sem besta erlenda myndin, er tilnefnd til tveggja Óskarsverðlauna og hreinlega rústaði spænsku Goya-verðlaununum um daginn. Fékk tólf verðlaun, meira en nokkur spænsk mynd hefur áður fengið. Þetta er sannsöguleg mynd um ævi Spánverjans Ramón Sampedro sem barðist í 30 ár fyrir því að mega binda enda á líf sitt með reisn. Hann er rúmliggjandi. Getur lítið annað gert en að horfa út um gluggann á hafið, þar sem hann starfaði áður sem sjómaður og þar sem hann lenti í slysi sem lamaði hann. Myndin fylgir sambandi hans við tvær konur. Lögfræðingurinn Júlía berst fyrir máli hans, að hann megi drepa sig ef hann vill. Nágrannakonan Rósa tekur í annan streng, hún vill telja Ramón trú um að lífið sé vert að lifa. Þrátt fyrir ósk hans að deyja, kenndi Ramón öllum sem urðu á vegi hans meiningu, tilgang og yndisleik lífsins. Þótt hann gæti ekki hreyft sig sjálfur hafði hann óútskýranlegan hæfileika til að hreyfa við öðrum. Javier Bardon leikur aðalhlutverkið og slær auðvitað í gegn eins og venjulega. The Sea Inside er sýnd í Regnboganum. Bíóumfjallanir, myndlist, leikhús, tónlist, allt um skemmtanalífið og margt fleira er að finna í Fókus sem fylgir DV á föstudögum.