Auður og Halldór hljóta bókmenntaverðlaunin

Auður Jónsdóttir og Halldór Guðmundsson hljóta Íslensku bókmenntaverðlaunin 2004. Ólafur Ragnar Grímsson, forseti Íslands, afhenti þeim verðlaunin við hátíðlega athöfn á Bessastöðum í gær.

Auður hlýtur verðlaunin í flokki fagurbókmennta fyrir skáldsöguna Fólkið í kjallaranum og Halldór í flokki fræðirita og bóka almenns efnis fyrir Halldór Laxness - ævisaga.

Mál og menning gaf út Fólkið í kjallaranum og JPV útgáfa Halldór Laxness - ævisaga.

Um árabil var Halldór í hópi aðstandenda Íslensku bókmenntaverðlaunanna. "Ég þekki verðlaunin hinum megin frá og sat í nefndum sem skipulögðu þau í meira en áratug. Þá ímyndaði ég mér aldrei að ég yrði hinum megin borðs," sagði hann, glaður í bragði, í samtali við Fréttablaðið í gær.

"Ég hef tvisvar áður verið tilnefnd og maður fær ekkert endilega verðlaun þó maður sé tilnefndur," sagði Auður, ekki síður glöð.

Hvort um sig hlaut 750 þúsund krónur, viðurkenningarskjöl og verðlaunagrip.