Ekki er öll nótt úti

Vinir Hollywood-hjónanna Brad Pitt og Jennifer Aniston, sem hættu saman fyrir skömmu, eru sannfærðir um að sambandsslitin séu aðeins örlítið skref aftur á bak áður en þau stofna fjölskyldu. Pitt hefur margoft lýst því yfir í viðtölum að hann sé tilbúinn að eignast börn en Aniston vill einbeita sér að kvikmyndaferlinum. Telja vinir þeirra að aðskilnaðurinn sé gott tækifæri fyrir þau til að íhuga framtíðaráform sín. "Þau vilja ekki að fólk haldi að skilnaðurinn sé slæmt mál," sagði einn vinurinn. "Þetta var góð ákvörðun fyrir þau. Þau eru ennþá mjög góðir vinir og þeim þykir vænt um hvort annað. Aðskilnaðurinn er bara skref aftur á bak fyrir þau til að sjá hvort sambandið geti varað að eilífu eða ekki. Þau eru að leita að svarinu, sem er svo sannarlega ekki auðvelt." Í viðtali við tímaritið Vanity Fair á síðasta ári gaf Pitt í skyn að skilnaður væri hugsanlegur. "Hvorugt okkar vill vera talsmaður fyrir hamingjusamt hjónaband. Jen og ég gerðum með okkur samkomulag um að við myndum sjá til hvernig sambandið myndi þróast," sagði hann. Hvorki Pitt né Aniston hafa leitað til skilnaðarlögfræðinga og gefur það orðrómi þessum byr undir báða vængi. Eftir að þau hættu saman þann 7. janúar hafa þau einnig haldið áfram að búa saman í glæsihýsi sínu í Hollywood.