Há dú jú læk Æsland?

Heimildarmyndin "How do you like Iceland?" verður frumsýnd sunnudaginn 16. janúar í Sjónvarpinu. Eins og titillinn gefur til kynna er þarna á ferðinni mynd sem tekur á skoðunum útlendinga á Íslandi og íbúum þess. "Upprunalega markmið mitt með myndinni var að endurskoða ímynd okkar og að skapa umræður og pælingar um efnið. Eigum við fegurstu konurnar, hreinasta vatnið og sterkustu mennina? Ég fór um víðan völl og talaði við 37 útlendinga sem eru eins mismunandi og þeir eru margir. Í hópnum eru blaðamenn, kvikmyndagerðarfólk, rithöfundar, fólk úr viðskiptaheiminum og fleira," segir Kristín Ólafsdóttir leikstjóri, handritshöfundur og framleiðandi myndarinnar. Fyrirtæki hennar Klikk Production hefur áður framleitt myndina Love is in the Air. Fólkið sem Kristín talaði við fyrir myndina segir hún allt eiga það sameiginlegt að hafa sótt Ísland oft heim og þar af leiðandi haft ágætis tíma til þess að mynda sér skoðun á þjóðinni. "Þetta er ekki hinn týpíski túristi heldur fólk sem virkilega veit eitthvað um okkur. Þetta er mynd sem snertir sjálfsmynd allra íslendinga. Myndin tekur á mörgum þáttum eins og arkitektúr, kurteisi okkar og húmornum. Þarna er fullt af hlutum sem við höfum gott af að heyra en samt ekkert endilega auðvelt fyrir viðkvæmar íslenskar þjóðarsálir," segir Kristín og hlær. Nokkrir þekktir einstaklingar koma fram í myndinni og láta í ljós sína skoðun á þjóðinni. Helst má nefna Damon Albarn söngvara Blur, Victoriu Abril leikkonu og Terry Jones úr Monty Python hópnum. Kristín vill þó taka fram að meirihluti viðmælenda eru óþekktir einstaklingar og venjulegt fólk. "Það er nauðsynlegt að taka þetta ekki of alvarlega og þó svo að útlendingar segi eitthvað um okkur þá er það ekkert endilega rétt. Raunveruleiki og ímynd er ekkert endilega það sama. Oft heyrði ég hluti sem ég veit alveg að eru ekkert réttir. Í gegnum myndina er þó rauður þráður og engin skoðun fór inn í myndina án þess að hún væri sögð nokkrum sinnum af mismunandi viðmælendum."