Er loksins að fullorðnast

"Ég er búin að hafa það mjög gott um jólin," segir Þórunn Erna Clausen leikkona sem hefur verið á ferðalagi á milli Akureyrar og Reykjavíkur öll jólin en hún leikur í söngleiknum Óliver sem Leikfélag Akureyrar sýnir þessa dagana. "Við erum rjúpnafjölskylda og höfum því þurft að vera svolítið frjálsleg síðustu jólin og í ár vorum við mjög ójólaleg og elduðum nautalundir sem var mjög fínt þó rjúpnalyktina hafi vantað en árlegi kalkúnninn á Gamlárskvöld reddaði málunum. Þrátt fyrir vonda veðurspá komst ég heim yfir hátíðarnar en annars hafa jólin að mestu leyti farið í vinnu. Frumsýningin gekk vel, fullt út að dyrum og allir voða kátir. Ég er búin að vera á eilífum þeytingi en ég vona að veðrið verði gott svo ég komist nú aftur norður," segir Þórunn og bætir við að á Akureyri hafi verið rosalega jólalegt en hún hafi þó saknað að hafa ekki fjölskylduna í kringum sig. Þórunn býr ásamt sambýlismanni sínum, Sigurjóni Brink tónlistarmanni, á góðum stað í Garðabæ. Þau eru að vísu búin að finna sér stærri íbúð sem þau munu flytja í í apríl. Sófinn í stofunni er uppáhaldsstaðurinn hennar á heimilinu en þaðan hefur hún ágætis útsýni á Snæfellsjökul. "Ég hef alltaf verið Garðbæingur, fyrir utan árin sem ég átti heima í útlöndum. Íbúðin sem við erum að flytja í er hér rétt hjá og því mun ég halda mig áfram við Garðabæinn." Aðspurð um nýliðið ár segist Þórunn Erna afar sátt. "Þetta er búið að vera skemmtilegt vinnuár og það er búið að vera mikið að gera. Hápunkturinn var frumsýningin á leikritinu Þetta er allt að koma og að fá að leika í Reykjavíkurnóttum sem eru grínþættir í "sitcom" stíl sem verða sýndir á stöð 2 í febrúar, og það var einnig mikill heiður að vera tilnefnd til Edduverðlaunanna. Ég held að árið 2005 verið einnig mjög spennandi og spái að það séu mikilla breytinga að vænta í persónulega lífinu. Lestu ítarlegt viðtal við Þórunni Ernu í tímaritinu Magasín sem fylgir DV í dag.