Svikin loforð í vegamálum

Formenn stjórnarflokkanna lofuðu fyrir síðustu kosningar að unnið yrði fyrir tæpan milljarð króna á næsta eina og hálfa ári í að byggja upp Gjábakkaveg, Suðurstrandarveg og veginn um Hellisheiði. Ekkert af þessu gekk eftir. Vegagerðin tekur þó sökina að nokkru á sig. Þremur mánuðum fyrir síðustu þingkosningar kynntu oddvitar stjórnarflokkanna á blaðamannafundi í Ráðherrabústaðnum að ríkisstjórnin hefði samþykkt að verja sex milljörðum króna næsta eina og hálfa árið til stóraukinna framkvæmda í landinu, einkum vegagerðar. Verkefnin voru talin upp og sagði Davíð Oddsson, þáverandi forsætisráðherra, meðal annars að setja skyldi 500 milljónir króna í Suðurstrandarveg, 200 milljónir í lagfæringar á vegi um Hellisheiði og 200 milljónir í Gjábakkaleið. Áhersla var lögð á að flýta þessum framkvæmdum. Fjármunina skyldi nota á næstu átján mánuðum. Síðan eru liðin rúmlega tvö ár og það er skemmst frá því að segja að ekkert af þessum þremur verkum komst í gang innan tímarammans. Vegagerðin segist þó taka sökina á sig að nokkru leyti. Jón Rögnvaldsson vegamálastjóri segist ekki líta svo á að um svikin kosningaloforð sé að ræða í þessum þremur tilvikum. Skýringarnar liggi fyrst og fremst í undirbúningi. Þannig hafi upphaf framkvæmda við veginn um Svínahraun tafist vegna þess að bætt hafi verið við mislægum gatnamótum. Þá hafi umhverfismat reynst tímafrekt vegna Gjábakkavegar og Suðurstrandarvegar. Vegamálastjóri játar þó að fjárveitingum hafi verið frestað í Suðurstrandarveg og er óvíst hvenær því verki lýkur og einnig í Gjábakkaveg sem þýðir að honum lýkur ekki fyrr en árið 2007.