800 grömm af próteini á mann

Scott David Rigler, framkvæmdastjóri Kárahnjúkadeildar Sodhexo Universal, virðist taka nærri sér þá gagnrýni sem hefur verið á kost starfsmanna Impregilo. Hann hefur starfað víða um heim fyrir hönd fyrirtækisins og segist aldrei hafa lent í eins mikilli orrahríð og hér. Honum er því mikið í mun að leiðrétta þá mynd sem gefin hefur verið. Sodhexo Universal er alþjóðlegur undirverktaki sem sér um innkaup á mat og öðrum nauðsynjum, stýrir mötuneytinu og matvöruversluninni og sér um þrif í vinnubúðunum á Kárahnjúkum. Gagnrýnin á Sodhexo hefur einkum verið á þá lund að maturinn sé ónægur og það segir Rigler að sé rangt. Það sé fyrirtækinu í hag að gera vel. Þegar mennirnir séu mettir og ánægðir vinni þeir vel. Hann segir að gott og ferskt hráefni sé keypt af íslenskum birgjum og flutt að Kárahnjúkum einu sinni í viku. Sodhexo framreiðir heitar máltíðir tvisvar á dag, í hádeginu og á kvöldin, og Rigler segir að þess sé gætt að starfsfólk af öllu þjóðerni fái eitthvað frá sínum heimahögum tvisvar í viku. Í hverri máltíð er gert ráð fyrir 800 grömmum af kjöti eða fiski á mann og Rigler segir að alltaf sé nóg af meðlæti; kartöflum, hrísgrjónum, pasta og spaghettíi auk grænmetis og ávaxta. Matarkostnaðurinn segir hann að sé 30-35 prósent af því sem gerist í öðrum löndum Evrópu. Rigler segir viðskipti Sodhexo við íslenska birgja skipta máli. Það sé gott fyrir samkeppnina að fá svona stóran aðila inn á markaðinn og íslenskir birgjar séu smám saman farnir að sjá að þeir geti lifað af viðskiptunum við Sodhexo. Þá veiti samkeppnin aðhald á markaðnum. Starfsmenn á vegum Rigler sjá um þrifin í vinnubúðunum og sömuleiðis þvotta fyrir verkamennina. Rigler telur heppilegra fyrir Íslendinga að draga úr gagnrýninni og horfa á starf Impregilo og Sodhexo með jákvæðari hætti; reyna að gera eins gott úr þessu og hægt er. Íslendingar geri ekkert annað en að græða á þessum framkvæmdum. "Það er verið að gera auðvelt starf erfitt," segir hann.