Alþjóðleg samkeppni um Vatnsmýri

Undirbúningur er nú hafinn að alþjóðlegri samkeppni um framtíðarskipulag Vatnsmýrarinnar. "Við teljum að þetta sé einstakt tækifæri til að halda alþjóðlega samkeppni um stórt lykilsvæði í hjarta höfuðborgar," segir Dagur B. Eggertsson. "Þetta hefur allt til að bera til að vekja heimsathygli meðal arkitekta og skipulagsfræðinga." Kostnaður við að halda keppnina liggur ekki fyrir. Stór óvissuliður í því efni er skipan dómnefndar. Rætt er um að fá stór nöfn úr arkitektaheiminum til að vekja áhuga á keppninni meðal þeirra bestu í heiminum á þessu sviði. Með keppninni vilja menn gera sér í hugarlund hvað hægt sé að gera á svæðinu. "Við viljum ná umræðunni upp úr þeim skötgröfum að vera með og á móti flugvellinum," segir Dagur. "Menn hafa ekki gefið sér vinnufrið til að fullkanna kostina í málinu. Það er mín sannfæring að hægt sé að finna niðurstöðu sem langflestir geti sætt sig við, hvar sem er á landinu." Jafnframt keppninni er verið að undirbúa svokallað samráðsferli um aðdraganda keppninnar. Efna á til samráðs við íbúa og hagsmunaaðila með stórri skipulagssýningu í Hafnarhúsinu í september. Sjálfstæðismenn í Reykjavík segja keppnina vera sjálfsagða, en hafa þó uppi ákveðin varnaðarorð. "Ég hef ákveðnar áhyggjur af tímasetningunni sem talað er um," segir Hanna Birna Kristjánsdóttir, borgarfulltrúi Sjálfstæðismanna, og fulltrúi þeirra í stýrihóp um skipulag Vatnsmýrarinnar. Hún telur mikilvægt að forsendur keppninnar séu skýrar til að góður árangur náist. "Nú standa yfir viðræður borgaryfirvalda og samgönguyfirvalda um þetta svæði og í þeim er allt opið. Best væri ef þær viðræður leiddu til skýrrar niðurstöðu um framtíð Vatnsmýrarinnar, en það er óheppilegt að efna til samkeppni þegar forsendurnar liggja ekki fyrir." Hanna Birna sagði þetta ennfremur ekki vera nýja hugmynd, heldur hafi hún oft verið rædd og í rauninni sé verið að framfylgja aðalskipulagi ársins 2001 þar sem hún var fyrst sett fram. Greinilegt er að skipulagsmál verða ofarlega á baugi í kosningabaráttunni því á borgarstjórnarfundi í gær kynnti Stefán Jón Hafstein, borgarfulltrúi Reykjavíkulistans, tillögur um framtíðarbyggð á Vatnsmýrarsvæðinu með tengingu við Áltanes. Samkvæmt þeim er gert ráð fyrir að Vatnsmýrin og Álftanes verði þróuð saman sem ein heild og tengd saman með hraðbraut yfir Skerjafjörðinn. Ekki er langt síðan sjálfstæðismenn kynntu sínar tillögur í skipulagsmálum. Úrslit í keppninni verða kynnt fyrir næstu borgarstjórnarkosningar.