Segja ólögmætið staðfest

VÁ vefjum verkalýðsfélaga mátti sums staðar sjá í gær fréttir um að Vinnumálastofnun hafi staðfest að starfsmannaleigan 2B hafi ekki farið að lögum. Vísað var til yfirlýsingar frá Gissuri Péturssyni forstjóra Vinnumálastofnunar um túlkun og framkvæmd laga um atvinnuréttindi útlendinga.

"Þar með er staðfest af hálfu Vinnumálastastofnunar að þeir starfsmenn starfsmannaleigunnar 2B sem starfa hér á grundvelli þjónustusamninga eru ólöglegir," segir á vef Verkalýðsfélag Akraness.

Í yfirlýsingu forstjóra Vinnumálastofnunar segir að upplýst skuli að Vinnumálastofnun túlki og framkvæmi lög um atvinnuréttindi útlendinga á þann veg að fyrirtæki með staðfestu á Íslandi, sem óski eftir erlendu vinnuafli frá hinum nýju ríkum Evrópusambandsins eða ríkjum utan EES verði að sækja hér um atvinnuleyfi og dvalarleyfi.

"Breytir þá engu hvort fyrirtækið er starfsmannaleiga eða stundar annars konar starfsemi," segir í yfirlýsingunni.

"Annað hvort eru menn ólæsir eða hafa algjört gullfiskaminni," segir Sveinn Andri Sveinsson, lögmaður 2B ehf.

Í sýknudómi Héraðsdóms Austurlands yfir GT-verktökum segir hann sérstaklega bent á fyrirvara í bráðabyrgðaákvæði laga um atvinnuréttindi útlendinga þar sem gildistöku sex mánaða reglunnar svokölluðu er frestað til maí 2006.

"Þess vegna kemst dómurinn að þeirri niðurstöðu að þriggja mánaða reglan sé óbreytt og enginn fyrirvari um hana."