Símafyrirtækjum gert að hlera

Síminn býr yfir búnaði til að hlera og taka upp símtöl. Samkvæmt frumvarpi um breytingar á fjarskiptalögum skulu öll fjarskiptafyrirtæki á Íslandi koma sér upp slíkum búnaði. Var frumvarpið rætt á fundi ríkisstjórnarinnar á föstudaginn. Fjarskiptafyrirtæki skulu samkvæmt frumvarpinu tryggja að yfirvöld geti hlerað símtöl og aflað sér annarra löglegra gagna í fjarskiptanetum sínum eða fjarskiptaþjónustu. Þá eigi fyrirtækin í þágu rannsókna opinberra mála og almannaöryggis að varðveita gögn um fjarskiptaumferð notenda í eitt ár. Í þeim upplýsingum verði hægt að sjá hvert notandinn hringir, hver hringir í hann, hvenær og hversu lengi hann talaði. Þetta eigi einnig við um nettengingar sem verði auðkenndar hverjum kaupanda þjónustunnar með IP-tölu. Þá eigi að vera hægt að sjá hver tengist internetinu, hvenær; magn gagnaflutnings hvort sem er til eða frá viðkomandi notanda og hvort hann hafi frumkvæði að tengingu eða ekki. Í greinargerð með frumvarpinu kemur fram að framangreind breyting er gerð að ósk ríkislögreglustjóra. Mál komi oft til rannsóknar löngu eftir að refsiverð hegðun hafi átt sér stað og því sé nauðsynlegt að tryggja að sönnunargögn séu til staðar við upphaf rannsóknar. Þá kemur fram að lögreglan rannsaki ekki mál nema fyrir liggi rökstuddur grunur um refsiverðan verknað. Óheimilt verður að nota eða afhenda umræddar upplýsingar öðrum en lögreglu eða ákæruvaldi.