Rjúpnaveiðar hefjast á ný

Sigmar B. Hauksson, formaður Skotveiðifélags Íslands, segist sannfærður um að skotveiðimenn stilli rjúpnaveiðum í hóf en rjúpnaveiðitímabilið hefst á morgun. Hann telur að um 3000 veiðimenn séu á leið á veiðar. Eftir tveggja ára rjúpnaveiðibann mega skotveiðimenn loksins veiða rjúpu á ný. Sigmar segist sannfærður um að veiðimenn muni stilla veiðum sínum í hóf. Rjúpuna má aðeins veiða til einkaneyslu, þar sem enn er bannað að selja rjúpur til verslanna og veitingahúsa. Sigmar segir að góð aukning hafi orðið í rjúpnastofninum. Hann telur að stofninn sé nú um átta hundruð þúsund til milljón fuglar og stofninn sé því í góðu ásigkomulagi.