Versti dagur ársins á morgun

Ef einhvern tímann er ástæða til að fara ekki á fætur heldur hanga í rúminu allan daginn, þá er það á morgun. Þá rennur upp versti dagur ársins samkvæmt nákvæmum útreikningum breskra vísindamanna. Ef þig langar allra mest til þess í fyrramálið að þrusa vekjaraklukkunni í vegginn, draga sængina upp fyrir haus og halda áfram að sofa þá er það í sjálfu sér ekkert undarlegt. Á morgun rennur nefnilega upp versti dagur ársins. Vísindamenn við Cardiff-háskóla í Bretlandi hafa með hjálp flókinna útreikninga komist að þessari niðurstöðu. Þar eru teknir með allir þeir þættir sem gera okkur lífið leitt í mesta skammdeginu. Fremst í flokki er veðrið. Líkurnar á leiðindaveðri og vondri færð eru yfirþyrmandi á morgun. Það gerir okkur strax ergilegri og eykur slysahættu í umferðinni. Þar sem við svo sitjum súr undir stýri bætast við áhyggjur af jólaeyðslunni og krítarkortareikningnum sem fer að detta inn um bréfalúguna. Gleðin sem fylgir því að gefa og þiggja á jólum er farin að minnka enda sléttur mánuður frá því við dönsuðum í kringum jólatréð. Og ekki bætir það skapið að hugsa um áramótaheitin. Það eru þrjár vikur síðan við ákváðum að taka upp heilbrigðari lífsstíl, hætta að reykja og stunda líkamsrækt. Það eru um það bil tvær vikur síðan þetta fór í vaskinn og við þurfum að horfast í augu við að við höfum ekki viljastyrk. Ofan á allan þennan blús bætist svo við að það er fátt að hlakka til á þessum árstíma og til að bæta gráu ofan á kolsvart þá er jú mánudagur á morgun. Allt saman gerir þetta það að verkum að mánudagurinn 24. janúar er verri en hinir 364 dagar ársins samkvæmt flóknum útreikningum Cliffs Arnalls, prófessors við Cardiff-háskóla. En það eru nokkur ráð sem geta gert daginn þolanlegri. Í fyrsta lagi er gott að borða góðan morgunmat. Hann veitir okkur aukna orku til að takast á við leiðindin. Svo getur verið gott að klæðast litríkum fötum á morgun því svart gerir bara vont verra. Rauður færir okkur orku en getur hins vegar gert okkur pirruð. Grænt og gult er gott, það örvar heilann. Ekki fara á fætur fyrr en í fyrsta lagi 12 mínútur yfir 7. Vísindamennirnir hafa komist að því að það dregur úr streitu. Það dregur líka úr streitu að vera góð við gæludýrin okkar. Og síðast en ekki síst verður dagurinn betri ef við syngjum með morguntónlistinni í útvarpinu. En það er kannski bara best að liggja undir sæng og leyfa deginum að líða. Þetta verður miklu betra á þriðjudaginn.