Hljómsveitin Vínyl til Texas

Hljómsveitin Vínyl heldur til Austin í Texas í mars þar sem þeir kauðar spila á tónlistarhátíðinni SXSW. Þetta er stærðarinnar hátíð þar sem margar hljómsveitirnar hafa fengið sitt stóra tækifæri. Ár hvert koma þarna fram hundruðir hljómsveita og í fyrra var nóg af stórum nöfnum og má þar helst nefna N.E.R.D, Dizzee Rascal, Blink 182, Scissor Sisters, TV On The Radio og Joss Stone. "Þetta er svona festival sambærilegt við Inner City, CMJ og Airwaves. Við sóttum um og vorum meðal þeirra sem voru valdir. Tvær íslenskar hljómsveitir í viðbót spila á tónleikunum. Það eru hljómsveitirnar Ske og Ampop," segir Egill Tómasson gítarleikari Vínyl. Hátíðin stendur yfir frá 16. til 20. mars og segir Egill þá félaga jafnvel munu spila á fleiri tónleikum í sömu ferð. "Það er ekkert komið á hreint en það getur vel verið að við spilum á fleirum tónleikum. Þarna er verið að sýna hvað er það ferskasta í tónlistarsenunni og þeir sem stjórna þessu eru gaurar sem stúdera músík út í eitt." Hljómsveitin fer út vel undirbúnir með splunkunýja plötu í farteskinu. Platan kemur út þann 3. febrúar og mun þá efnt til heljarinnar útgáfutónleika. Þetta er fyrsta stóra plata Vínyls og ber hún heitið LP. "Þetta er að sjálfsögðu gríðarlega spennandi fyrir okkur og við erum mjög ánægðir. Við höfum breyst mjög mikið sem hljómsveit síðan við byrjuðum að spila saman. Platan spannar allt tímabilið sem við erum búnir að vera að spila saman í þessari mynd og það heyrist vel á plötunni. Við sækjum áhrif úr öllum áttum og ómögulegt að nefna einn áhrifavald. Fólk verður bara að hlusta á plötuna."