Ekki gripið til öryggisráðstafana

Ekki hefur verið gripið til sérstakra öryggisráðstafana hérlendis í dag vegna atburðanna í London. Dómsmálaráðherra segir að öryggiskerfi landsins hafi verið styrkt á undanförnum misserum. Við breska sendiráðið við Laufásveg mátti sjá merki þess að einhverjir vildu sýna samhug sinn í verki en tveir blómsveigar lágu á tröppum sendiráðsins um miðjan dag. Ekki var að sjá að öryggisgæsla þar hefði verið hert í dag. Á Keflavíkurflugvelli var öryggisviðbúnaður með venjubundum hætti en dómsmálaráðherra, Björn Bjarnason, segir að ekki hafi verið talin ástæða til grípa sérstakra varúðarráðstafana í dag. Eftirlitskerfi á flugvöllum eigi að virka jafnvel núna og endranær og hættumatið hér á landi sé ekki það sama og í Bretlandi. Ráðherrann minnir á að öryggiskerfi landsins hafi verið styrkt á undanförnum misserum. Sérsveit lögreglunnar hafi t.a.m. verið efld. Eftir 11. september voru hliðin inn á svæði varnarliðsins á Keflavíkurflugvelli styrkt sérstaklega og öryggisviðbúnaðurinn þar verið gríðarlegur síðan. Jóhann R. Benediktsson, sýslumaðurinn á Keflavíkurflugvelli, segir að engar róttækar ákvarðanir hafi verið teknar í öryggismálum vegna atburðanna í London. Hins vegar sé Keflavíkurflögvöllur í nánum samskiptum við flugvelli á Norðurlöndum varðandi samræmingu öryggisþátta vegna ódæðisverksins í morgun.   Dómsmálaráðherra segir að Íslendingar verði eins og aðrar þjóðar að líta til þessara þátta. Það sé mikill barnaskapur ef við höldum að við séum algjörlega óhult fyrir hryðjuverkamönnum.