Dæmdur fyrir að meiða persónu og æru Valgerðar

Félagsmálaráðherra braut meðalhófsregluna við starfslok Valgerðar H. Bjarnadóttur, fyrrverandi framkvæmdastjóra Jafnréttisstofu. Hæstiréttur dæmdi henni 6 milljónir króna í bætur. Lögmaður Valgerðar segir ástæðu þess að Hæstiréttur snýr við dómi Héraðsdóms meðal annars þá að ekki nóg með að vera dæmdur fyrir að misbeita valdi sínu heldur sé félagsmálaráðherra einnig dæmdur fyrir að meiða persónu og æru Valgerðar.

Árið 2002 tók Valgerður þátt í því sem stjórnarformaður Leikfélags Akureyrar að ráða karlmann leikhússtjóra. Samhliða því starfi var hún framkvæmdastjóri Jafnréttisstofu. Kærunefnd jafnréttismála taldi að ráðning leikhússtjórans stangaðist á við jafnréttislög. Eftir það gerði Árni Magnússon félagsmálaráðherra Valgerði ljóst að hún nyti ekki lengur trausts og í framhaldi af því sá hún sig tilknúna að segja starfi sínu lausu hjá Jafnréttisstofu. Hálfu ári síðar hnekkti Hæstiréttur niðurstöðu kærunefndar jafnréttismála. Valgerður sótti rétt sinn og Hæstiréttur sneri í dag sýknudómi héraðsdóms og dæmdi félagsmálaráðherra brotlegan og skaðabótaskyldan; hann hefði getað náð tilgangi sínum með vægari úrræðum en hann beitti. Í stað brottvikningar hefði hann getað vikið Valgerði frá tímabundið, eins og hún lagði sjálf til, uns niðurstaða dómstóla lægi fyrir.

Valgerður segir að félagsmálaráðherra, og allt annað fólk í valdastöðum sem veit að það hefur misbeitt valdi sínu, ætti að hugsa sinn gang, nú þegar Hæstiréttur hafi kveðið upp þann dóm að þetta sé ólöglegt - en ekki eingöngu ósiðlegt. Aðspurð hvort henni finnist eðlilegt að ráðherra íhugi jafnvel að segja af sér segist Valgerður ekki hafa nokkra skoðun á því. Það sé hans mál, en hann þurfi að hugsa sitt mál.

Valgerður hyggst ekki sækja aftur um starf framkvæmdastjóra Jafnréttisstofu; þeim kafla í lífi hennar sé lokið.

Ástráður Haraldsson, verjandi Valgerðar, segir Hæstarétt meta sönnunarstöðuna öðruvísi en héraðsdómur og líta aðgerðir ráðherra öðrum augum. Þá spili einnig inn í að dómurinn sé óvenjulegur og fordæmisskapandi og það sé frekar hlutverk Hæstaréttar en Héraðsdóms að skapa slíkt fordæmi. Ástráður nefnir sérrstaklega í þessu sambandi að ekki nóg með að vera dæmdur fyrir að misbeita valdi sínu, heldur sé félagsmálaráðherra einnig dæmdur fyrir að meiða persónu og æru Valgerðar.

Árni Magnússon félagsmálaráðherra segist, í yfirlýsingu sem hann sendi frá sér eftir að dómurinn féll, hafa orðið fyrir vonbrigðum með dóminn, hann hafi notið lögfræðilegrar leiðsagnar við meðferð málsins, en endanleg niðurstaða sé fengin og hann óski Valgerði velfarnaðar.