Rómantík og ribbaldar

Það styttist enn frekar í stórmyndina King Kong sem frumsýnd verður miðvikudaginn 14. desember. Fram að því ætlar Reese Witherspoon að stytta okkur stundirnar með því að ganga aftur og þeir John Cusack og Billy Bob Thornton komast í hann krappan þegar þeir reyna svíkja fé út úr glæpaforingja í Wichita.

Það er Harold Ramis sem leikstýrir Ice Harvest en hann er ef til vill þekktastur fyrir hlutverk sitt sem dr. Egon Spegler í Draugabönum sem gerðu allt vitlaust á fyrri hluta níunda áratugarins. Þó að hann bregði sér öðru hvoru fram fyrir myndavélarnar hefur hann að mestu leyti helgað sig skrifum og leikstjórn. Viðfangsefni þessarar nýjustu myndar hans er lögfræðingurinn Charlie Aglist í Wichita sem hefur haft gott upp úr því að verja óþokka borgarinnar. Hann ákveður að gefa sjálfum sér nokkuð veglega jólagjöf frá aðalglæpaforingjanum, Bill Guerrard. Ásamt aðstoðarmanni sínum, Vic Cavanaugh, stelur hann rúmum tveimur miljónum dala. Charlie hyggst eyða sínum hluta með strippbúllueigandanum Renetu en hlutirnir fara á annan veg en hann hafði í hyggju.

Það eru John Cusack, Billy Bob Thornton, Oliver Platt og Connie Nielsen sem fara með aðalhlutverkið í þessari gamansömu jólamynd. Randy Quaid bregður sér í hlutverk illmennisins en hann er um þessar mundir að leika í Milos Forman myndinni Goya's Ghosts. Það kom eflaust mörgum á óvart þegar bandaríska leikkonan Reese Witherspoon var valin til að leika June Carter í Walk the Line.

Áður en Reese tók að sér hlutverkið hafði hún unnið sér það helst til frægðar að leika hina ofurheimsku Elle Woods í Legally Blonde myndunum. Myndinni var strax spáð mikilli velgengni bæði í miðasölu en ekki síst á óskarnum því Johnny Cash er með eindæmum vinsæll í Bandaríkjunum og látnir tónlistarmenn hafa alltaf trekkt vel í kvikmyndahúsum þar vestra.

Frammistaða Reese í myndinni hefur komið mörgum á óvart og vakið mikla athygli en henni hefur verið spáð óskars­tilnefningu. Leikkonan er þó á kunnuglegum slóðum í Just Like Heaven en þar er á ferðinni rómantísk gamanmynd. Á móti henni leikur Mark Ruffalo en hann er góðri leið með að verða næsti Hollywood-sjarmörinn. Hjúkrunarkonan Elizabeth hefur engan tíma fyrir sjálfa sig heldur sekkur sér niður í vinnuna. Það kemur hins vegar babb í bátinn þegar hún deyr í bílslysi á leiðinni heim. Inn íbúðina hennar flytur piparsveinninn David sem að öllu jöfnu ætti að vera einn í henni. Elizabeth hefur þó ekki gefist alveg upp fyrir manninum með ljáinn heldur telur sig vera á lífi. Piparsveininum til mikils ama gefur hún sig ekki en þegar þau fara að kynnast nánar er ljóst að ástin nær út fyrir gröf og dauða.