Hætta vegna tjöru

Lögreglan í Borgarnesi þurfti um tíma að vakta kafla þjóðvegarins efst í Borgarfirði í fyrrakvöld eftir að klæðning verktaka fyrr um daginn misfórst með þeim afleiðingum að mikið magn tjöru sat á veginum. Þótti lögreglu hætta stafa af fyrir vegfarendur og stóð vakt þangað til Vegagerðin sendi mannskap á vettvang til að laga veginn. Lögreglan hafði engar skýringar á tjörunni aðrar en að svo virtist sem rignt hafi ofan í glænýja klæðningu verktaka sem vann við veginn fyrr um daginn með þessum afleiðingum. Vegagerðin brást þó skjótt við enda mikill hraði á þessum slóðum og tjörupollur mun hættulegri en vatnspollur. Voru þeir bílar sem um veginn fóru útataðir en viðgerð Vegagerðarinnar tók stuttan tíma eftir að þeir voru komnir á vettvang.