Áfengi ógnar lýðheilsu landans

"Það sem er mesta áhyggjuefnið eru þær hugmyndir sem uppi eru að auka aðgengi að áfengum drykkjum," segir Rafn M. Jónsson, verkefnisstjóri áfengis og vímuvarna hjá Lýðheilsustöð. Niðurstöður könnunar um áfengisneyslu Íslendinga sem kynntar voru í gær benda meðal annars til að ungt fólki drekki oftar en áður og meira magn í hvert sinn. Sams konar könnun var gerð fyrir fjórum árum síðan og þrátt fyrir að um frumniðurstöður sé að ræða telja forsvarsmenn Lýðheilsustöðvar ljóst að vaxandi áfengisneysla ógni lýðheilsu Íslendinga. Fram kemur að þó að fjöldi þeirra sem neyta áfengis standa nokkuð í stað á þessu tímabili hefur magnið aukist og sérstaklega á það við um unga karlmenn. Drekka þeir að meðaltali tæpa tvo lítra af bjór meðan konurnar láta 1.3 lítra duga í hvert sinn. Bæði kyn hafa þó aukið neysluna síðan 2001. Hlutfall sterkra drykkja í neyslumynstrinu heldur áfram að minnka og fleiri drekka léttvín eða bjór í staðinn. Þó ber að taka fram að í þeim niðurstöðum sem birtar voru eru ekki tölur yfir drykkju heimabruggs né heldur drykkju svokallaðra blandaðra drykkja en slíkir drykkir eru afar vinsælir meðal ungs fólks. Ýmsir aðilar á borð við Samtök verslunarinnar og Samtök ferðaþjónustunnar hafa barist fyrir auðveldara aðgengi og lækkun gjalda á áfengi hér á landi og segist Rafn hafa af því vissar áhyggjur. "Þrátt fyrir að hugmyndin sé ekki að vera með neina forræðishyggju þá hefur það ítrekað sýnt sig að auðveldara aðgengi að áfengi, til að mynda í matvöruverslunum, eykur neyslu þegar í stað og það þrátt fyrir að eftirlit hafi verið aukið til muna á sama tíma. Við óttumst að hið sama verði hér uppi á teningnum en aukinni drykkju fylgir svo margt annað óæskilegt eins og heilsukvillar, ölvunarakstur og þar fram eftir götunum."