Ánægja með frumvarpið

"Við erum almennt ánægðir með þessa stjórnvaldsbreytingu og teljum að hún muni verða til góðs," segir Ari Edwald, framkvæmdastjóri Samtaka atvinnulífsins, vegna frumvarps Valgerðar Sverrisdóttur iðnaðar- og viðskiptaráðherra um sameiningu Samkeppnisráðs og Samkeppnistofnunnar í Samkeppniseftirlitið og stofnun Neytendastofu. Samtökin voru umsagnaraðilar þegar frumvarpið var í skoðun og segir Ari að einu stórvægilegu athugasemdir sem gerðar hafi verið þá hafi viðkomið heimild þessarar nýju stofnunar að brjóta upp þau fyrirtæki sem brutu samkeppnislög. "Að okkar mati var sú heimild of loðin og óskýr og ekki bundin við brot á lögum og ekki virtist vera um neina frestun á þeirri framkvæmd þó slík mál færu fyrir dómstóla." Annað sem Samtök atvinnulífsins gerðu athugasemd við var að ekkert sérstakt tillit var tekið til lítilla fyrirtækja en samtökin meta það svo að rýmri heimildir eigi að gilda um þau gagnvart samkeppnislögum en um þau stærri. "Það er eingöngu í því skyni að gefa litlu fyrirtækjunum góða möguleika á að vaxa með því að hafa samstarf sín á milli enda er slíkt algengt."