Jón Ásgeir ýjar að samsæri

Tímasetning á ákærunum er afskaplega undarleg segir Jón Ásgeir Jóhannesson forstjóri Baugs í viðtali sem birtist í Sunday Times á morgun.  Hann segist þar ætla að bíða með frekari stórviðskipti uns hann hafi sannað sakleysi sitt. Brynhildur Ólafsdóttir, fréttakona Stöðvar 2, fékk aðgang að blaðinu og hún segir að í viðskiptahluta blaðsins sé ýtarleg umfjöllun um málefni Baugs, bæði á forsíðu og inni í blaðinu.  Í viðtali við tvo blaðamenn segir Jón Ásgeir að síðasta vika hafi verið einhver sú versta í hans viðskiptalífi og að hann ætli sér ekki að standa í frekari stórviðskiptum fyrr en sakleysi hans sé sannað og að það ætti ekki að taka lengri tíma en hálft ár. Í viðtlinu kemur reyndar fram´að Baugur sé í þann mund að kaupa tískuverslunina Jane Norman en líta megi á það sem smáviðskipti. Jón Ásgeir virðist hafa upplýst Sunday Times um innihald ákæranna því þar er haldið fram að aðeins tvær af ákærunum tengist upphaflegum umkvörtunarefnum Gerald Sullenbergers, 20 séu tengdar viðskiptum milli Baugs og fjárfestingafélags Jóns Ásgeris, Gaums, önnur 6 tengist bókhaldsmálum og afgangurinn sé brot á tollalögum og vafasöm notkun Jóns á kreditkortum Baugs. Í viðtalinu ýjar Jón Ásgeir að því að málið sé allt sprottið af annarlegum hvötum og segir að tímasetningin sé skrítin. Hann heldur því líka fram að árangur hans í viðskiptum hafi valdið óróa innan íslenska kerfisins. Orðrétt segir hann að ekki sé langt síðan gamlar fjölskyldur réðu öllu í landinu og að gríðarleg tengls hafi verið á milli stórfyrirtækja og stjórnmálamanna. Umfjöllunin í blaðinu er á afar jákvæðum nótum og blaðamennirnir virðast taka undir það að pólitískar ofsóknir og persónuleg öfund séu að einhverju leyti undirrót málatilbúnaðar ríkislögreglustjóra. Þetta er ein alls herjar sópuópera með öllu tilheyrandi, svikum, morðhótunum, fallegum konum og peningum skrifar William Lewis ritstjóri viðskiptablaðsins og heldur áfram: „Nú er bara að bíða eftir lokum þessarar sápu en á meðan ættu viðskipti Jóns Ásgeris að geta gengið sinn gang.“