Mjótt á mununum í borginni

Sjálfstæðisflokkurinn næði meirihluta í borgarstjórn ef gengið yrði til kosninga nú samkvæmt nýrri skoðanakönnun Gallups.  Fimmtíu komma tvö prósent þeirra sem tóku þátt sögðust ætla að kjósa Sjálfsstæðisflokkinn, fjörutíu og níu prósent R-listann og núll komma átta prósent Frjálslynda flokkinn.  Sexhundruð og sjötíu Reykvíkingar á kosningaaldri voru í úrtakinu og var svarhlutfall 56,1 eitt prósent. Alfreð Þorsteinsson forseti borgarstjórnar segir það hafa gerst áður að Sjálfstæðisflokkur mælist með meira fylgi og að alltaf sé frekar mjótt á munum milli þessara fylkinga. Hann reiknar með að sá vandræðagangur sem einkennt hefur undirbúning R-lista framboðsins valdi nokkru um það að fylgið er ekki eins mikið og það ætti að vera. Hann segist taka skoðanakönnunum með varúð og hún sýni það að baráttan er hörð og að borgarstjórnarkosningar næsta árs verði spennandi. Aðspurður um það sem hann kallar vandræðagang og hvort  borgarstjórnarflokkarnir þurfi ekki að taka sig saman í andlitinu segir hann að flokkarnir hafi tekið sér alltof langan tíma til að komast að niðurstöðu um áframhaldandi Reykjavíkurlistasamstarf og bendir síðan á að könnunin hljóti því að vera hvatning til þeirra að klára málið. Vilhjálmur Þ. Vilhjálmsson oddviti Sjálfstæðismanna í borgarstjórn segist þakklátur fyrir það traust sem Reykvíkingar sýna.  Spurður að því hvort aukið fylgi sé starfi og stefnu Sjálfstæðisflokksins að þakka eða vandræðagangi innan R-listans, segist hann geta fullyrt að flokkurinn hafi verið að vinna vel að ýmsum hagsmunamálum borgarbúa og að bjartstýni og gleði ríki í herbúðum þeirra, á meðan R-listinn er önugur og innan hjópsins ríkir ósætti um framboðsmál. Hann segir jafnframt að störf Sjálfstæðisflokksins á undandförnum árum sé að skila sér. Aðspurður um það hvort að hann muni leiða flokkinn í næstu kosningum segist hann ekki geta sagt um það en bendir á að hann bjóði sig fram til þess og hvort aðrir bjóði sig einnig fram verði að koma í ljós. Síðast þegar Gallup kannaði fylgi í Reykjavík, í janúar á síðasta ári mældist Sjálfstæðisflokkurinn með 42,5 prósenta fylgi, R-listinn með 54 komma þrjú prósent og Frjálslyndi flokkurinn með tveggja komma níu prósenta fylgi.