King að ná heilsu

Enski landsliðsmaðurinn Ledley King er óðum að ná sér af nárameiðslum sínum og stefnir á að vera með liði sínu Tottenham þegar það tekur á móti Liverpool í ensku úrvalsdeildinni á laugardaginn, King hefur enn ekki spilað leik með Lundúnaliðinu á tímabilinu, en hefur nú náð sér ágætlega og er farinn að æfa á fullu. "Ég hélt að ég myndi finna til í náranum á fyrstu æfingunum, en ég hef verið sársaukalaus fram að þessu og vona að ég missi ekki úr fleiri leiki í vetur," sagði fyrirliði Tottenham. Þá er Tom Huddlestone einnig að ná sér af sínum meiðslum, en hann hefur enn ekki náð að spila sinn fyrsta leik fyrir Tottenham síðan hann gekk í raðir félagsins frá Derby.