Vætusamt sumar

Sumarið var fremur rýrt að gæðum sé tekið mið af úrkomu og veðri um helgar og fengu ferðalangar á Vesturlandi til að mynda ekki eina einustu þurru helgi. Ekki hefur rignt meira á Norðurlandi í ágúst í þrettán ár og var úrkoma þar meiri en í Reykjavík sem er mjög óvenjulegt að mati Sigurðar Ragmarssonar, veðurfréttamanns á Stöð 2.  Hvað hitatölur varðar er sumarið þó nálægt öðrum sumrum þegar horft er á sumarið í heild sinni. Þá segir Sigurður að það sem mönnum hafi þótt athyglisvert við þetta sumar er að af og til gerði vindhvelli sem ollu töluverðu tjóni . Þetta var því afleitt sumar en sumarið í fyrra var reyndar óvenju gott. Hvað haustið varðar segir hann þó að fátt bendi til annars en að það verði þokkalegt og ekki óvíst að fallegir haustdagar sýni sig við og við.