Mótmæla harðlega skotæfingasvæði

Íbúar á Eiðum mótmæla harðlega fyrirhuguðu skotæfingasvæði, skammt frá barnaskólanum á Eiðum, sem bæjaryfirvöld á Fljótsdalshéraði hafa sent í grenndarkynningu. Bæjarstjóranum var í morgun afhentur undirskriftalisti með mótmælunum. Fyrirhugað er að setja upp sérstakt skotæfingasvæði á Eiðum, að beiðni Skotveiðifélags Austurlands, en það yrði staðsett í einungis 700 metra fjarlægð frá barnaskólanum á Eiðum. Bæjaryfirvöld á Fljótsdalshéraði hafa þegar sent áformin í svokallaða grenndarkyningu, þar sem íbúum gefst kostur á að kynna sér þau, en skotæfingasvæðið er ekki inni á aðalskipulagi. Allir íbúar á Eiðum 18 ára og eldri, fjörutíu talsins, og flestir þeir sem búa innan 3ja kílómetra radíuss frá fyrirhuguðu skotæfingasvæði, eru reiðir vegna áformanna og hafa mótmælt þeim formlega. Þeir afhentu Eiríki Birni Björgvinssyni, bæjarstjóra, undirskriftalista með mótmælunum í í morgun og krefjast þess að önnur lausn verði fundin.