Díselolía í tönkum við Smáralind

Ríflega fimm þúsund lítrar af díselolíu eru geymdir í tönkum á bílastæði við Smáralindina. Eigandi olíunnar kveðst vita um fleiri samskonar tilvik. Það fór væntanlega ekki fram hjá mörgum að verð á díselolíu hækkaði um réttan helming fyrir skömmu. Fregnir bárust af því að ýmsir hefðu hamstrað olíu áður en verðhækkunin tók gildi, en fá dæmi hafa hins vegar fundist. En í dag frétti fréttastofan af því að mikið magn díselolíu væri geymt á bílastæði við Smáralindina. Við nánari eftirgrennslan kom í ljós að eigendur fyrirtækisins Flutningar.is voru þar á ferð. Þeir höfðu keypt nokkurt magn plasttanka utan af ávaxtaþykkni frá Ölgerð Egils Skallagrímssonar og fyllt þá af díselolíu - 5600 lítrum af díselolíu, nánar til tekið. Tönkunum komu þeir fyrir í tengivagni á bílastæði milli Smáralindar og Smáratorgs. Ríkislögreglustjóri, slökkvilið höfuðborgarsvæðisins, heilbrigðiseftirlitið og fleiri stofnanir eru að vinna að rannsókn mála af þessu tagi en nokkur sambærileg mál munu hafa komið upp - jafnvel að mikið magn díselolíu hafi verið geymt innanhúss. Ekki þarf að fjölyrða um hverjar afleiðingar elds í því húsnæði gætu orðið, eða hvað gæti gerst við Smáratorgið. Að sama skapi er hætta á mengun af völdum olíunnar og því verður að líkindum gripið til aðgerða á næstunni.