Óvissa um næstu skref í Baugsmálinu

Hæstiréttur felldi í dag úr gildi úrskurð Héraðsdóms Reykjavíkur um að sérstakur saksóknari í Baugsmálinu, hefði ekki ákæruvald í þeim átta ákæruliðum málsins sem eru enn til meðferðar í héraðsdómi. Þetta þýðir þó ekki að skorið hafi verið endanlega úr um hver fari með ákæruvaldið.

Héraðsdómur Reykjavíkur úrskurðaði í síðustu viku að Sigurður Tómas Magnússon hefði ekki ákæruvald í þeim átta ákæruliðum Baugsmálsins sem enn eru til meðferðar í héraðsdómi en áður hafði Hæstiréttur vísað þrjátíu og tveimur ákæruliðum frá dómi. Hæstiréttur ógilti þennan úrskurð í dag en þar með er þó ekki endanlega ljóst að Sigurður Tómas fari með ákæruvaldið heldur má búast við að á það reyni næst þegar Baugsmálið verður tekið fyrir í Héraðsdómi Reykjavíkur. Í kjölfar dóms Hæstaréttar má búast við að Sigurður Tómas mæti þá sem ríkissaksóknari í dómssal og að verjendur láti reyna á hvort vera hans þar sé tekin gild.

Þeir sem koma að málinu og rætt hefur við segjast þurfa góðan tíma til að fara yfir hvað dómur Hæstaréttar þýðir í raun en eru sammála um að sennilega eigi langur tími eftir að líða áður en endanlega verður ljóst hvort Sigurður Tómas er bær til að fara með ákæruvaldið eða ekki.