Kristinn gagnrýndi Davíð

Kristinn H. Gunnarsson, þingmaður framsóknarmanna, gagnrýndi yfirlýsingar Davíðs Oddssonar seðlabankastjóra um Íbúðalánasjóð harðlega í lok fjárlagaumræðunnar í nótt. Kristinn sagði að bankastjórinn talaði eins og stjórnmálamaður og spurði hvort búast mætti við því að hann færi að gefa út línu varðandi aðra þætti viðskiptalífsins.

Kristinn H. Gunnarsson var síðastur á mælendaskrá um fjárlagafrumvarpið en þá var komið fast að miðnætti. Hann brást við ummælum Davíðs Oddssonar á viðskiptaþingi á mánudag þar sem Davíð sagði meðal annars að húsnæðislánakefið hefði orðið úrelt þegar þær bankarnir fóru að lána og samkeppnistaða á íbúðamarkaði gengi ekki upp meðan Íbúðalánasjóður nyti ríkisábyrgðar. Kristinn sagði eðlilegt að stjórnmálamaður hefði þessa skoðun en það væri ekki hlutverk seðlabankans að senda stjórnmálamönnum tóninn, um hvað þeir ættu að gera. Og hvernig íbúðalánakerfi eigi að þjóna landsmönnum.

Lúðvík Bergvinsson þingmaður Samfylkingar innti fjármálaráðherra eftir samantekt frá Ríkisábyrgðasjóði sem hann hefði fengið staðfest hjá Lánasýslu ríkisins að hefði verið send ráðuneytinu fyrir skemmstu.

Árni Matthiesen fjármálaráðherra svaraði því til að hann hefði óskað upplýsinga í ráðuneytinu hvort samantektin væri þar. Hann sagði hana ekki hafa borist en hins vegar gæti það villt mönnum sýn að gengið hefði á milli ráðuneytis og stofnunarinnar drög að skýrslu sem enn væri ekki tilbúin.

Kristinn brást einnig við ummælum Lúðvíks Bergvinssonar um Íbúðalánasjóð í fréttum okkar á sunnudag, þar sem hann sagði að það væri óðs manns æði að veita sjóðnum ríkisábyrgð meðan ekki lægi fyrir úttekt á fjárjagsstöðu sjóðsins né heldur að samantekt Ríkisábyrgðarsjóðs lægi fyrir. Kristinn sagði að Fjármálaeftirlitið og Ríkisendurskoðun hefðu lögum samkvæmt eftirlit með Íbúðalánasjóði og Ríkisábyrgðasjóður hefði ekkert um það að segja. Stjórnsýsluskýrsla Ríkisendurskoðunar sýndi ennfremur að sjóðurinn væri vel rekinn.

Árni Matthíesen fjármálaráðherra hnyktti á því í svari sínu að skýrsla Ríkisenduskoðunar væri ekki úttekt á fjárhagsstöðu sjóðsins heldur einungis stjórnsýsluútekt. Hann sagði að þrátt fyrir að ríkisábyrgðir yrði samþykktar á fjárlögum fengi sjóðurinn þær ekki sjálfkrafa. Fjármálaráðherra hefði hinsvegar heimild til að láta sjóðinn hafa þær.

Félagsmálanefnd tekur skýrslu Ríkisendurskoðunar um Íbúðalánasjóð á dagskrá fjórtánda desember.