Eminem á toppinn

Ný safnplata frá rapparanum Eminem, Curtain Call - The Hits, fór beint á topp breska metsölulistans eftir aðeins tvo daga á lista. Skákaði hún þar plötu Madonnu, Confessions on a Dance Floor, sem hefur notið mikilla vinsælda upp á síðkastið. Þetta er fjórða platan í röð frá Eminem sem fer beint á topp breska listans.

Safnplötunni fylgir auka­diskurinn Stan's Mixtape með áður óútgefnum lögum. Þar eru meðal annars lög sem Eminem hefur gert í samvinnu við aðra listamenn, þar á meðal The Notorious B.I.G og Jay-Z. Á safnplötunni sjálfri eru þrjú ný lög, þar á meðal When I'm Gone. Annars er þar að finna lög á borð við Stan, Lose Yourself, The Real Slim Shady og Just Lose It.