"Gef mér!" syngur Andrea

Andrea Gylfadóttir hefur verið ráðin í hlutverk plöntunnar í uppsetningu Leikfélags Akureyrar á söngleiknum Litlu Hryllingsbúðinni sem frumsýndur verður í febrúar. "Þetta leggst vel í mig og ég geri þetta á minn hátt," segir Andrea.

"Ég þurfti að hugsa mig aðeins um þar sem ég þarf að vera með annan fótinn á Akureyri en ákvað að slá til." Í fyrri uppsetningum hafa Björgvin Halldórsson og Bubbi Morthens ljáð plöntunni raddir sínar og segir Magnús Geir Þórðarson leikhússtjóri að ekki hafi hver sem er getað fetað í þeirra fótspor.

"Það dugði ekkert minna en að fá sannkallaða kanónu sem Andrea Gylfa svo sannarlega er, enda ein af okkur bestu söngkonum. Okkur þótti líka spennandi að hafa kvenrödd, þannig að þetta er kvenplanta sem étur menn og það kallast á eitt og annað í þeim leiðum sem við ætlum í þessari uppsetningu." Með önnur hlutverk fara Vigdís Hrefna Pálsdóttir sem leikur Auði, Jóhannes Haukur Jóhannesson sem leikur Ómar Konráð tannlækni, Guðjón Davíð Karlsson, Þráinn Karlsson, Álfrún Helga Örnólfsdóttir, Esther Talía Casey, Ardís Ólöf Idolstjarna og Guðjón Þorsteinn Pálmarsson.