Geta fengið olíuna endurgreidda

Björn Karlsson brunamálastjóri segir Brunamálastofnun hafa borist allmargar vísbendingar um fólk sem hamstraði olíu fyrir gildistöku olíugjaldsins og geymi hana við óviðunandi aðstæður. Hann segir að fólk sem vilji losna við olíuna og hættuna sem fylgir henni geti skilað henni til olíufélaganna og fengið hana endurgreidda. Hægt er að geyma olíuna löglega í þartilgerðum tönkum sem eru sérmerktir og með leyfi frá Umhverfisstofnun. Þá mega einstaklingar sem hafa tilskilin leyfi eiga allt að fimm þúsund lítra af olíu. Að öðrum kosti er beinlínis ólöglegt að geyma dísilolíu. Dísilolía er ekki jafn eldfim og bensín og því í raun ekki sérstaklega mikil hætta á því að það kvikni í út frá henni. Hins vegar er ljóst að ef kviknar í af öðrum ástæðum mun dísilolía alltaf auka á eldinn og gera slökkviliði erfiðara fyrir. Einnig er gríðarleg mengunarhætta af dísilolíu komist hún út í umhverfið. Hægt er að skila dísilolíunni til olíufélaganna sem kaupa hana til baka á sama verði að því gefnu að hún sé í söluhæfu ástandi. Rétt er þó að brýna fyrir fólki að ekki gengur að koma með olíuna á afgreiðslustöðvar, hafa þarf samband við skrifstofur olíufélaganna þar sem veittar eru upplýsingar um hvernig eigi að losna við olíuna.