Olíufélögin taka við díselolíu

Leyfilegt var að kaupa 5000 lítra af olíu á hverja kennitölu áður en verðbreytingin átti sér stað um síðustu mánaðarmót og virðast allnokkrir hafa nýtt sér það og hamstrað olíu. Eins og Fréttastofa Stöðvar 2 greindi frá í síðustu viku mátti finna eina 5600 lítra af díselolíu á bílastæði við Smáratorg í eigu flutningsfyrirtækisins Flutningar.is. Olían var geymd í plasttönkum utan af ávaxtaþykkni frá Ölgerð Egils Skallagrímsonar. Málið er til skoðunar hjá Slökkviliði höfuðborgarsvæðisins, Ríkislögreglustjóra og Heilbrigðiseftirlitinu. Páll Stefánsson hjá Heilbrigðiseftirliti Kópavogs, Garðabæjar og Hafnafjarðar segir að fólkið sem hamstrar olíu sé undir öllum kringumstæðum ábyrgt fyrir henni ef upp kemur óhapp. Skemmst er að minnast þess þegar bruni varð í Ísbjarnarhúsinu á Seltjarnarnesi fyrir um tveimur árum en þar voru slökkviliðsmenn í mikilli hættu þegar eldur barst í olíubirgðir sem þar voru geymdar. Páll segir það ábyrgðarleysi að geyma olíu við ófullnægjandi aðstæður og hvetur fólk sem hefur hamstrað olíu til að hafa samband við Slökkviliðið, Eldvarnareftirlitið eða Heilbrigðiseftirlitið til að fá ráðgjöf varðandi geymsluaðstæður. Á fundi með Slökkviliði Höfuðborgarsvæðisins í síðustu viku buðust Olíufélögin til að sækja olíu til fólks sem telur geymsluaðstæður ekki fullnægjandi. Standist olían gæðakröfur eru Olíufélögin tilbúin að endurgreiða olíuna, miðað við verð fyrir mánaðarmót, en ef hún er ónýt taka þeir við henni og koma henni í förgun. Páll vonar því að fólk sem hefur hamstrað olíu verði sem fljótast að klára hana eða nýti sér þann kost að skila henni aftur til olíufélaganna.