Lennon og McCartney Bíldudals

Páll Ágústsson sjómaður hefur í tuttugu ár verið ein helsta driffjöðurin í menningarlífi Bíldudals og meðal annars staðið fyrir landsþekktum vísnakvöldum, sem haldin hafa verið í bænum frá 1987. "Það má vel sjá á nýjum geisladiski sem gefinn var út í tilefni hátíðarinnar Bíldudals grænar um daginn að þessi vísnakvöld hafa heppnast vel en diskurinn er uppfullur af listamönnum sem stigu sín fyrstu skref á vísnakvöldi," segir Páll. "Sumir fóru þó aðrar leiðir eins og sést best á einni helstu menningarspírunni á Ísafirði en þar fer okkar maður; Elfar Logi Hannesson. Hann steig sín fyrstu skref hér einnig." Páll segir að líka séu óvenju mörg ljóð- og tónskáld í Arnarfirði og vill meina að fjörðurinn hreinlega framleiði listamenn."Við sem stöndum að kvæðakvöldunum höfum gert skáldið Hafliða Magnússon og tónskáldið Ástvald Jónsson að heiðursfélögum enda eru lög þeirra og textar jafnan fyrirferðarmikil á þessum kvöldum. Þeir eru svona Lennon og McCartney okkar Arnarfirðinga." Dansleikjahald hefur að mestu lagst niður á Bíldudal en Páll var ekki í vandræðum með að skipuleggja dansiböllin á árum áður. "Við uppgötvuðum Siggu Beinteins, hún var frekar lítið þekkt þegar við borguðum stjörnuprís fyrir hana. Þegar ballið var búið sátum við svo eftir með heilar þrjúþúsund krónur í hagnað," segir Páll og hlær. Fyrir skemmstu hætti Bílddælingur, stærsti atvinnurekandi bæjarins allri starfsemi og segir Páll að nú sé þungt hljóð í mörgum og jafnvel komið fararsnið á marga. "Ég fer hins vegar ekki neitt, ég flyt aldrei úr Arnarfirðinum," segir Páll og lemur í borð að sjóara sið.