Finnar á Íslandi fagna sjálfstæði

Finnland fagnar í dag 88 ára afmæli sínu sem sjálfstætt ríki. Landið öðlaðist sjálfstæði frá Rússum í kjölfar rússnesku byltingarinnar árið 1917. Það gerðist þó ekki átakalaust, þar sem borgarastríð fylgdi í kjölfarið milli hvítliða og rauðliða sem kostaði næstum 40.000 manns lífið. Sendiráð Finnlands um allan heim bjóða Finnum og fólki sem tengist Finnlandi til veislu til að minnast sjálfstæðisins og er Ísland engin undantekning. En hvernig fagna Finnar sjálfstæði sínu á heimavelli? "Við kveikjum á hvítum og bláum kertum til að minnast þeirra sem féllu í borgarastríðinu," segir hin finnsk-íslenska Virpi Jokinen, sem unnið hefur hjá Norræna félaginu á Íslandi undanfarin sex ár. "Svo er haldin móttaka hjá forsetanum sem er sýnd í beinni útsendingu. Næstu daga er talað um í vinnunni hverjum var boðið og hverjum ekki, hver var í hverju og svo framvegis. Maður kemst eiginlega ekki hjá því að fylgjast með þessu ef maður er í Finnlandi." Miður vetur er kannski frekar óheppilegur tími til að fagna þjóðhátíðardegi. Þegar Íslendingar lýstu yfir fullveldi var það fyrsta desember en sjálfstæði var lýst yfir 17. júní sem er öllu heppilegri tími fyrir skrúðgöngur. "Það er meira klapp á þjóðhátíðardaginn hér og ég held að Íslendingar myndu fagna mikið jafnvel þó hann væri í desember. Við tökum þessu allt öðruvísi, við heiðrum þá sem dóu fyrir Finnland og fögnum þeim sem eitthvað gott hafa gert fyrir Finnland eða heiminn. Í fyrra voru til dæmis þeir finnsku hjálparstarfsmenn sem fóru að hjálpa til eftir flóðin í Asíu heiðraðir sérstaklega." Virpi er fædd og uppalin í Finnlandi en hefur búið á Íslandi í þrettán ár. Hún kom hingað fyrst sem sumarstarfsmaður í Nordjobb og hefur ílengst hér síðan. Hún hefur nýverið fengið íslenskan ríkisborgararétt til viðbótar við þann finnska. "Reglunum var breytt fyrir um tveimur árum og þá var gert leyfilegt að hafa bæði ríkisföngin. Ég bý hér og borga skatt hér og langar til að kjósa hér í næstu kosningum þess vegna sóttist ég eftir íslenskum ríkisborgararétti." Um hundrað Finnar búa á Íslandi, og eru þá ekki taldir með þeir sem hafa tvöfaldan ríkisborgararétt. Munu þeir fagna sjálfstæði sínu í Norræna húsinu seinna í dag. valurg@frettabladid.is