Selma og Chanel

Leikkonan Selma Blair hefur krækt sér í samning við Chanel og verður nú andlit Chanel Vision þar sem hún kynnir hátísku hins gríðarstóra tískuhúss. Selma er einmitt sjálf mikill aðdáandi Chanel og klæðist oftar en ekki fötum þaðan, auk þess sem hún þekkir aðalhönnuðinn Karl Lagerfeld persónulega.

Þegar hún giftist Ahmet Zappa, syni Frank Zappa, á síðasta ári klæddist hún að sjálfsögðu kjól frá Chanel. Karl Lagerfeld tók svo sjálfur myndirnar af Selmu fyrir auglýsingaherferðina. "Við Karl erum miklir vinir og það er skrítið að láta hann ljósmynda sig. Ég er svo róleg fyrir framan hann. Stundum ýta aðrir ljósmyndarar á mig og segja: "Gefðu mér meira Selma, meira, meira." En þeir þekkja ekki hina raunverulegu Selmu. Karl nær miklu betur að sýna hver ég er í raun og veru, ekki einungis sem fyrirsæta," sagði hún ánægð með nýja samninginn.