Glettin skrif um tónleika

Fjallað er á glettinn hátt um tónleika Stuðmanna í Royal Albert Hall á skírdag í breska dagblaðinu Daily Telegraph í dag. Í grein sem ber yfirskriftina „Iceland the uncool," eða Hið ósvala Ísland, gerir höfundur greinarinnar, Thomas H. Green, góðlátlegt grín að sveitinni en segir að hún hafi svo sannarlega skemmt íslenskum áhorfendum í tónleikahöllinni. Green hefur greinina á að minnast á að sveitin hljóti að eiga valdamikla vini, eða eiganda Hamleys, sem hafi tekið tónleikahöllina á leigu. Hann segir enn fremur að þeir 1.500 Íslendingar sem verið hafi í Royal Albert Hall hafi kunnað að meta skemmtunina og tónlist Stuðmanna hafi verið glaðvær frá upphafi til enda. Þá hrósar hann Agli Ólafssyni og Ragnhildi Gísladóttur, aðalsöngvurum sveitarinnar, fyrir samvinnu sína. Blaðamanni er tíðrætt um skrýtinn klæðaburð hljómsveitarmeðlima á sviðinu og þá segir hann brandara Stuðmanna hafa farið fyrir ofan garð og neðan hjá Bretum en Íslendingar hafi kunnað að meta þá. Eftir hlé hafi áhorfendur algjörlega sleppt fram af sér beislinu og verið eins og unglingar á lokaballi. Þeir hafi tekið hressilega undir í Sísí fríkar út, sem höfundur segir eins og blöndu af knattspyrnusöng og stælingu á B52´s, og að sveitin hafi verið klöppuð upp fjórum sinnum af ánægðum Íslendingum. Hinir sem hins vegar hafi átt von á framúrstefnulegri tónlist sem Ísland hafi verið þekkt fyrir hingað til hafi eflaust verið skemmt en súrealísk lög Stuðmanna hafi átt mest sameiginlegt með hallærislegum lögum frá Evróvisjónkeppninni á áttunda áratugnum.