Leikskólabörn brögðuðu á dópi

Sjö dönsk leikskólabörn voru lögð inn á spítala eftir að þau höfðu bragðað á eiturlyfjum sem þau fundu í skógi við Frederikssund í Danmörku í dag. Börnin, sem eru á leikskóla í Farum, voru ásamt kennurum sínum í skógarferð þegar nokkur þeirra fundu nokkra poka með hvítu dufti í. Þau náðu að bragða á efninu, sem lögregla telur vera kókaín, áður en starfsmenn leikskólans komu að þeim og voru í kjölfarið flutt á sjúkrahús til rannsóknar. Eftir því sem kemur fram á vefmiðli danska blaðsins Politiken verða þau útskrifuð síðar í dag en lögregla hefur hins vegar girt skóginn af og kannar nú hvort meira sé af fíkniefnum á svæðinu.