Fimmtíu ára Nóbelsafmæli

Þess var minnst í Þjóðmenningarhúsinu í gær að fimmtíu ár eru liðin frá því að Halldór Laxness fékk bókmenntaverðlaun Nóbels. Fjöldi fólks fylgdist með fjölskrúðugri hátíðardagskrá sem hófst klukkan ellefu og stóð fram á kvöld.

Tónlistarflutningur af ýmsu tagi setti stóran svip á dagskrána, en einnig var efnt til málþings þar sem meðal annars var fjallað um viðtökur við verkum Halldórs Laxness fyrir og eftir Nóbelsverðlaunin. Um kvöldið lásu síðan skáldin í Nýhil-hópnum úr verkum sínum undir yfirskriftinni "Unglingarnir í skóginum".