Afdrep í jólaösinni

Í dag opnar Benedikt S. Lafleur listasetur fyrir almenning að Hólmaslóð 15 í Reykjavík. Benedikt, sem er bókaútgefandi, rithöfundur, myndlistarmaður og sjósundkappi með meiru, ætlar að bjóða þarna upp á afdrep fyrir unnendur jafnt myndlistar sem bókmennta auk þess sem þarna verður rými þar sem menn geta dregið sig í hlé til andlegrar íhugunar.

"Ég ætla að hafa opið á hverjum degi frá klukkan 12 til 18 fram að áramótum svo kemur í ljós hvað verður eftir það," segir Benedikt. Á opnuninni í dag, sem hefst klukkan 15, verður boðið upp á veitingar, þar á meðal engiferseyði sem Benedikt segir nánast allra meina bót. "Þetta er róandi fyrir lifrina og veitir víst ekki af svona rétt fyrir jólin þegar menn eru fullir af stressi og borða allt of mikið af súkkulaði og hangikjöti. Á opnuninni verður líka leikin suðuramerísk tónlist á gítar og mikið fjör," bætir Benedikt við og vill sérstaklega hvetja krakka til að koma. "Það verður þarna mikið af krökkum sem ég hef verið að kenna glermálun."