Bandaríkjamenn hankaðir á kompunum

"Það var verið að hanka Bandaríkjamenn á litlu kompunum þeirra. Það þarf að taka þá aðeins upp á eyrunum og finna leikstoðirnar þeirra," segir Bragi Skúlason "Baggalútur". "Það þarf að fara að finna grenin þar sem þeir fara með vondu kallana og kitla þá til sagna." Bragi segist sjá bjarta hlið á mögulegri notkun Bandaríkjamanna á Keflavíkurflugvelli til að millilenda með fangana.

"Það er ákaflega gleðilegt að Bandaríkjamenn hafi einhver not fyrir flugvöllinn, það er ekki hægt að neita því. Hann má ekki bara rykfalla en það er kannski óþarfi að nota hann í þessum blessaða tilgangi," segir hann.

Aðspurður segist Bragi vera ókátur með pyntingar á hryðjuverkamönnum þó svo að hann hafi reyndar ekki verið vitni að þessum pyntingum. "Þetta eru víst nýstárlegar aðferðir sem þeir nota. Kannski eru þeir bara að spila fyrir þá Helgu Möller eða eitthvað." "Svo eru blessaðir þingmennirnir okkar orðnir örmagna af aðgerðaleysi og eru loksins að sleppa í jólafrí. Það er samt ekki sauðburður sem er afsökunin núna heldur jólaundirbúningur og að skreyta heimilið," segir Bragi.