Fara um Japan syngjandi

Íslenski söngflokkurinn Voices thules, sem sérhæfir sig í miðaldasöng, er á ferðalagi um Japan þessa dagana ásamt hópi hljóðfæraleikara og dansara. Þau eru samtals fimmtán talsins, nefna sig Borealis Ensemble og eru að kynna íslenska miðaldatónlist á tónleikaferðalagi um fimmtán borgir í Japan, sem hófst með tónleikum í Okayama í lok nóvember.

Í kjölfarið fylgja borgirnar hver af annarri en lokaáfanginn er höfuðborgin Tókýó og er ferðinni heitið þangað núna í þessari viku. Sverrir Guðjónsson, einn helsti forsprakki þessa ferðalags, segir undirbúning sýningarinnar hafa tekið heilt ár. Yfirskrift hennar er "Goðsagnir í íslenskri tónlist", en þarna er að sögn Sverris á ferðinni viðamikil "myndræn tónlistarflétta þar sem miðaldir og samtími ganga í eina sæng."

Hann segir eitthvað heillandi við japanskt samfélag, "sem við Íslendingar getum lært mikið af. Rætur listar, fágunar og mannlegra samskipta liggja langt aftur í aldir og er Japönum í blóð borið. Hvert einasta viðvik er unnið af ýtrustu nákvæmni og fagmennsku, þar sem virðingin fyrir verkinu er í fyrirrúmi. Maður gæti ætlað að slík nálgun kalli á þunga undiröldu og alvarlegheit, en annað er uppi á teningnum, húmorinn aldrei langt undan og Japanir afar hláturmildir."